Саудия Арабистони сайёҳлик компанияси билан учрашув ташкил этилди

 

 

Ўзбекистоннинг Саудия Арабистондаги элчиси Улуғбек Мақсудов “Ваҳатал ҳарир” туристик компанияси  раҳбари Абдулмажид бин Абдулазиз билан учрашди. Бу ҳақда “Дунё” ахборот агентлиги хабар берди.

 

Унда икки мамлакат туризм соҳасидаги ҳамкорлик масалалари муҳокама қилинган. Улуғбек Мақсудов Абдулмажид бин Абдулазизга   Ўзбекистонда сайёҳлик соҳасини ривожлантириш, бу йўналишда инвестиция киритаётган маҳаллий ва хорижий инвесторларга яратилаётган шарт-шароитлар ҳақида батафсил маълумот берди. Ўзбекистоннинг бой тарихий-маданий мероси, қадимий меъморий ва археологик обидалари, хусусан, Самарқанд, Бухоро, Хива, Шаҳрисабз, Термиз, Қўқон ва Тошкент шаҳарларининг туристик имкониятларига алоҳида эътибор қаратилди.

 

Элчи, шунингдек, Ўзбекистонга саудиялик сайёҳлар сонини ошириш  мақсадида Ўзбекистоннинг Ар-Риёддаги элчихонаси «Dolores Travel Group» сайёҳлик агентлиги ва Саудиянинг «FlyNas» авиакомпанияси билан биргаликда жорий йил 9–16 сентябрь кунлари подшоҳликнинг 12 та йирик сайёҳлик компаниялари вакиллари учун Тошкент, Самарқанд ва Бухоро шаҳарларига инфо-тур ташкил этаётганини маълум қилган.

 

Абдулмажид бин Абдулазиз туризм ва инвестиция соҳаларида амалга оширилаётган беқиёс ислоҳотларни юқори баҳолади. У, шунингдек, Саудия Арабистонининг «FlyNas» авиакомпанияси томонидан «Ар-Риёд-Тошкент-Ар-Риёд» йўналиши бўйича йўлга қўйилган тўғридан-тўғри авиқатновлар икки мамлакатнинг сайёҳлари сонини ва ўзаро савдо ҳажмини ошишига хизмат қилишини қайд этган.

 

Абдулмажид бин Абдулазиз саудиялик сайёҳларнинг Ўзбекистонга қизиқиши ортаётганини ҳисобга олган ҳолда бу йўналишдаги ўзаро алоқаларни ривожлантириш бўйича қатор таклифларини билдирган.

 

Аввалроқ Саудия Арабистонидан Тошкентга мунтазам рейс йўлга қўйилгани хабар қилинган эди.