"Бугун бўлмадими, Парижда албатта бўлади" — Шавкат Мирзиёев
Айни вақтда давлат раҳбари Токиода бўлиб ўтган XVI Паралимпия ўйини иштирокчиларини катта ютуқ ва ғалабалар билан қутламоқда.
- Мен ушбу тақдирлаш маросимига устозларингиз билан бирга ота-онангизни ҳам чақирдим. Биласизми, ота-она учун энг катта бахт – боласининг камолини кўриш. Ўзингиз ҳам ота-она бўлганингизда яхшироқ тушунасиз. Мен сиздек фарзандларни тарбиялаганлари учун уларга таъзимдаман ва миннатдорман, - деди президент.
Шавкат Мирзиёев мусобақада қатнашиб, совриндор бўлолмаган спортчиларга ҳам далда берди:
- Ғолиб бўлмасангиз ҳам ушбу мусобақада матонат билан қатнашганингиздан миннатдорман. Бугун бўлмаса, Парижда (2024 йилда ўтказиладиган мусобақалар-изоҳ) албатта бўлади!
Маълумот учун, терма жамоамиз 8 та олтин, 5 та кумуш ва 6 та бронза медалини қўлга киритди. 19 та медалнинг 11 таси спортчи қизларимизга тегишли.
Мамлакатимиз терма жамоаси 160 дан зиёд давлатлар ўртасида ўн олтинчи Осиё қитъасида ҳамда Мустақил Давлатлар Ҳамдўстлигида тўртинчи, Марказий Осиёда эса биринчи ўринни эгаллади.
Шавкат Мирзиёев ҳар бир спортчи, хусусан, енгил атлетикачи қизлар- Нозимахон Қаюмова, Моҳигул Ҳамдамова, София Бурҳонова ҳамда рақибалари орасида энг ёш бўлган таэквондочи Гулжоной Наимовага алоҳида ташаккур айтди.
- Гулжанойнинг мусобақасини ташвиш ва ҳаяжонда телевизорни ўчириб-ёқиб кўрдим. Бу жуда катта ғалаба бўлди, деди президент.
