Жозеф Байден: "Мен 2001 йил 14 сентябрда эълон қилинган фавқулодда ҳолатни яна бир йилга узайтираман"
АҚШ Президенти Жозеф Байден мамлакатда 2001 йил 11 сентябрь ҳужумларидан кейин жорий қилинган фавқулодда ҳолатни бир йилга узайтирди. Бу ҳақда Оқ уй матбуот хизмати хабар берди.
Вашингтон маъмурияти раҳбари АҚШ Конгрессига юборган хабарномасида таъкидлаганидек, "террорчилик хавфи мавжудлиги сабабли 2001 йил 14 сентябрда эълон қилинган фавқулодда ҳолат" яна бир йилга узайтирилди. "Мен 2001 йил 14 сентябрда эълон қилинган фавқулодда ҳолатни яна бир йилга узайтираман", дейди Байден.
Янги муддат 2001 йил 11 сентябрдаги терактлардан кейин АҚШда террорчилик хавфи сақланиб қолаётгани муносабати билан қўшилди.
Фавқулодда вазият ҳолати президентга исталган вақтда амалга ошириши мумкин бўлган қўшимча қонуний ваколатлар беради.
Амалдаги қонунга кўра, агар мамлакат президенти фожиали санадан кейин 90 кун ичида Конгрессга сўров юбормаса ва расмий ҳужжатлар сақланадиган Федерал реестрда эълон қилишни буюрмаса, фавқулодда ҳолат режими автоматик равишда тўхтатилади.
Эслатиб ўтамиз, аввалроқ АҚШда 2001 йил 11 сентябрь кунги терактларнинг янги тафсилотлари очиқлангани тўғрисида хабар берилганди.
Насиба Тўхтаева
