Литвада чегарачи ҳарбийлар ваколатлари кенгайтирилди
Литвада ҳарбий хизматчиларнинг Беларусдан ноқонуний иммигрантлар оқими кўпайгани боис чегарада ҳаракат қилиш учун ваколатлари кенгайтирилди.
Президент Гитанас Науседанинг бу ҳақдаги фармонини Литва Сейми тасдиқлади. Бу ҳақда” Diet” матбуот маркази хабар бермоқда.
Чегарани қўриқлаш билан шуғулланадиган Литва ҳарбийлари энди жисмоний ва юридик шахсларга кўрсатмалар бериш, ушбу кўрсатмаларга риоя қилмаган шахсларни таъқиб қилиш ва ушлаш, жиноят содир этганликда гумон қилинаётганларни ушлаб туриш, транспорт воситаларини тўхтатиш, товарлар ва одамларни текшириш каби ваколатларга эга бўлди.
Эслатиб ўтамиз, Польша, Литва, Латвия ва Эстония бир неча ой давомида Беларусдан ўз чегараларини ноқонуний кесиб ўтишга минглаб уринишлар бўлаётганини қайд этмоқда. Улар Минскни Европа Иттифоқига қарши гибрид урушда ноқонуний муҳожирлардан қурол сифатида фойдаланаётганликда айбламоқда.
Ноқонуний муҳожирлар оқими "Александр Лукашенко режими томонидан режалаштирилган ва тизимли равишда ташкил қилинган", дейилади 23 августда эълон қилинган ушбу давлатлар бош вазирларининг қўшма баёнотида.
Европа Иттифоқи Беларусь раҳбари Лукашенко режимига қарши бешинчи санкциялар пакетини тайёрламоқда.
