Сомалилик муҳожир автобусда 5 нафар йўловчига пичоқ санчди
Италиянинг Римини шаҳрида автобусда кетаётган эркак беш кишига пичоқ билан ҳужум қилди, деб ёзади “Corriere”.
Маълум қилинишича, бир йўловчи автобусда икки нафар назоратчи қизга пичоқ санчган. Назоратчи қизлар йўловчидан автобус чиптасини тақдим этишни сўраган. Йўловчи дастлаб бу талабга жавоб бермади, лекин иккинчи марта сўрашганидан сўнг сумкасидан пичоқ чиқариб, бир қизнинг бўйнига, иккинчисининг елкасига санчди.
Эркак автобусда яна учта йўловчи, шу жумладан, вояга етмаган болани жароҳатлади. Кейин эса воқеа жойидан қочиб кетган.
Полиция гумондорни темир йўл бўйидан ҳибсга олди: у 26 ёшли Сомалидан келган муҳожир экани маълум бўлди.
Хабар қилинишича, ҳужумдан сал олдин эркак Италияда қочқин мақомини олиш учун ариза берган.
Ҳуқуқ -тартибот идоралари унинг ҳужум пайтида гиёҳвандлик таъсири остида бўлиши мумкин деган тахминни билдирган.
Бундан аввал Британиянинг Бристол шаҳрида номаълум эркак ёқилғи қуйиш шохобчасидаги дўкон ходимларига пичоқ билан ҳужум қилган эди.
