Билл Гейтс янги пандемияларга қарши курашнинг ягона йўлини айтди
Бу ҳақда Гейтс “The Wall Street Journal” нашрига берган интервьюсида маълум қилган.
Унинг фикрича, кейинги пандемиялар ҳозиргидан-да ёмонроқ бўлиши мумкин. Лекин инсоният унинг олдини олишга ҳаракат қилмаяпти. Миллиардер янги пандемияларга қарши энг яхши чора — вакциналарни дастлабки 100 кунда яратиш ва ишлаб чиқаришни тезлаштириш эканини таъкидлаган. Гейтс буни амалга оширишни имкони бор деб ҳисобламоқда.
Бундан аввал Билл ва Мелинда Гейтс фонди махсус ҳисоботда вакциналар тақсимотидаги тенгсизликни қоралаб чиққан эди. Ҳисоботда айтилишича, ривожланган давлатларда аллақачон 80 фоизгача аҳоли тўлиқ эмланган бўлса, қашшоқ давлатларнинг айримларида бу кўрсаткич 1 фоизга ҳам етмайди. Масалан, бутун бошли Африка қитъаси 48 миллион доза вакцина олган бўлса, Калифорния штати 42 миллион дозада вакцина қабул қилган. Лекин штат аҳолиси Африканикидан 30 баробар кам. Шунингдек, ҳисоботда инсониятнинг юқумли касалликларга қарши курашнинг умумий механизмларини яратишга қодир эмаслиги қайд этилган.
Гейтс пандемияга қарши фаол курашиб келаётган шахслардан. Унинг фонди янги коронавирусларга қарши самарали вакцина ва препаратлвр яратиш учун миллионлаб доллар маблағ ажратиб келади. Хусусан, 10 сентябрда фонд шу мақсадда 70 миллион доллар хайрия қилган.
Эслатиб ўтамиз, бундан аввал Буюк Британияда коронавирусга қарши болалар ҳам эмланиши маълум қилинган эди.
Жаҳонгир Қўзиев
