ЕИ паст ва ўртача даромадли мамлакатларга коронавирусга қарши қўшимча вакцина ажратади
Европа Иттифоқи расмийлари келаси йилнинг ўрталарига қадар паст ва ўртача даромадли мамлакатларга коронавирусга қарши қўшимча 200 миллион доза вакцина ажратади. Бу ҳақда Европа Комиссияси Президенти Урсула фон дер Ляйен Страсбургдаги Европа Парламентидаги йиллик маърузасида маълум қилди.
"Келгуси йилнинг ўрталарига келиб, кам таъминланган мамлакатларга яна 200 миллион доза қўшамиз", деди у.
Европа Иттифоқи 130 мамлакатга 700 миллион дозадан ортиқ вакцина экспорт қилган.
Еврокомиссия раҳбари европаликларга глобал эмлашни тезлаштириш, эмлаш ишларини Иттифоқнинг ўзида давом эттириш ва қитъанинг бўлажак пандемияга тайёрлигини кучайтириш каби учта устувор йўналишга эътибор қаратишни таклиф қилди.
Бундан аввал ЖССТ мамлакатларни коронавирусга қарши вакциналарнинг дунёда нотекис тақсимланиши учун танқид қилган эди. Умуман олганда, 5,5 миллиард дозадан ортиқ вакцина ишлаб чиқарилган, бироқ уларнинг қарийб 80 фоизини юқори даромадли мамлакатлар фуқаролари қабул қилган.
Насиба Тўхтаева
