Ўқитувчиларга аттестациядан ўтганлик тўғрисидаги сертификат электрон шаклда берилади
Педагог кадрларга қоғоз шаклдаги аттестациядан ўтганлик тўғрисидаги сертификат бериш амалиёти бекор қилинади.
Шунингдек, электрон рақамли имзо билан тасдиқланган ва QR-код қўйилган электрон шаклдаги сертификат бериш тартиби жорий этилади.
Бу ҳақда Таълим сифатини назорат қилиш Давлат инспекцияси хабр қилди.
Унда айтилишича, энди ўқитувчи хоҳлаган пайтида QR-код қўйилган электрон шаклдаги сертификатни ўзининг шахсий кабинетидан юклаб олиши мумкин.
Таълим инспекциясининг “pedkadr.tdi.uz” платформаси UzASBO ҳамда мактаб бошқарув (ERP) дастурлари билан интеграция қилинмоқда. Бу, ўз навбатида, мактаб бухгалтериясига ўз тоифасини оширган ўқитувчилардан ҳеч қандай ҳужжат талаб қилмасдан, уларнинг иш ҳақини автоматик тарзда қайта ҳисоблаш ва тўлаб боришга имкон беради.
Мазкур қарор кучга киргунга қадар аттестациядан ўтганлик тўғрисидаги берилган сертификатлар ўз кучида қолади. Шу билан бирга амалда малака тоифасини тасдиқлашда, шунингдек, амал қилиш муддати тугагунга қадар сертификатда кўрсатилган малака тоифаси бўйича базавий тариф ставкалари асосида ҳақ тўлаш кабилар ҳисобга олинади.
Эслатиб ўтамиз, аввалроқ инновацион платформа ўқитувчилар малака ошириши учун янги имконият экани ҳақида хабар берилганди.
Чўлпоной Аҳмедова
