“Толибон” ҳукумати инаугурацияси ўтказилмайди
21 сентябрь куни “Толибон” барча вазир ўринбосарлари таркибини эълон қилди. Бу ҳақда “Associated Press” хабар берди.
Унда бирорта аёл ўринбосар номи келтирилмаган. 7 сентябрь куни эълон қилинган ҳукумат таркибидан ҳам бирорта аёл ўрин олмаган. Бу гарчи халқаро ҳамжамиятда жиддий норозилик уйғотган бўлса-да, толиблар ўринбосар лавозимига хотин-қизларни тайинламаган.
Ушбу амалдорлар таркибини Кобулда бўлиб ўтган конференцияда ҳаркат расмий вакили Забиҳулло Мужоҳид эълон қилган. “Associated Press”нинг фикрича, аёлларсиз ҳукумат “Толибон” сиёсати янада қаттиқўл бўлишидан далолат беради. Мужоҳид ҳукумат таркибига кам сонли миллатлар, хусусан, хазоралар жалб қилингани, кейинчалик аёллар ҳам кириши мумкинлиги, янги ҳукумат инаугурацияси ўтказилмаслигини маълум қилган.
“Толибон”нинг аёлларга нисбатан муносабати жаҳон ҳамжамияти танқидига сабаб бўлмоқда. Улар 90 йилларда ҳам аёлларнинг ишлаши ва таълим олишини таъқиқлаб қўйган.
Бундан аввал Забиҳулло Мужоҳид “Толибон” аёллар таълимига қарши эмаслигини айтганди.
Жаҳонгир Қўзиев
