Покистон Афғонистонга хавфсизлик хизмати ходимлари тайёрлашда ёрдам беришга тайёрлигини билдирди
Покистон Афғонистонга хавфсизлик хизмати ходимлари тайёрлашда ёрдам беришга тайёрлигини билдирди. Бу ҳақда Покистоннинг Кобулдаги элчиси Мансур Аҳмад Хон маълум қилди.
“Биз Афғонистон ҳукумати билан хавфсизлик хизмати тайёрлаш доирасида ҳамкорлик қилишимиз мумкин. Аммо барчаси афғон ҳукуматига боғлиқ. Афғонистон –– суверен давлат ва у ўз эҳтиёжини ўзи белгилаши керак. Шундай экан, Покистон ёки исталган бошқа давлат билан бу манфаатларни ҳаётга татбиқ этиш учун ҳамкорлик қилиши мумкин”, — деган Мансур Аҳмад Хон.
Элчининг фикрича, ҳозирда ҳукумат бошқарув институтларини тузиш ва қайта тиклаш билан банд. Бу жараён тугалланганидан кейин ҳамкорликка эҳтиёж туғилиши табиий, чунки бу ҳар икки давлат тинчлиги ва барқарорлиги учун муҳим.
Аҳмад Хон Афғонистон ва Покистон яқин қўшнилар эканини эслатиб ўтди. Икки давлатнинг ягона дини ва маданияти, шунингдек, 2.6 минг километрли умумий чегара иқтисодий ҳамкорлик учун катта йўл очади. “Шу билан бирга биз хавфсизлик ва террорчиларнинг чегаралардан ўтиши билан боғлиқ муаммоларга дуч келяпмиз. Шу сабабли собиқ ҳукумат билан ҳам ҳамкорлик ўрнатганмиз. Биз бундан буён ҳам хавфсизлик ва терроризимга қарши кураш соҳасида биргаликда ҳаракат қилишни истаймиз”, – деб таъкидлаган.
Бундан аввал Тожикистон ташқи ишлар вазири Сирожиддин Муҳриддин жаҳон ҳамжамиятини Панжшерга ёрдам беришга чақирганди.
Жаҳонгир Қўзиев
