Украина Президенти маслаҳатчиси машинасига ўқ узилди. Ҳайдовчи оғир аҳволда
Украина Президенти Владимир Зеленский маслаҳатчиси Сергей Шефирга суиқасд уюштирилди. Унинг машинаси ўққа тутилган.
“Автомобилга 10 дан ортиқ ўқ теккан. Ўқ “Калашников” автоматидан отилган. Шефир ишга кетаётганда, ўрмон тарафдан ўқ узилган”, — деган Украина ички ишлар вазирлигидаги манба. Шефирга ҳеч нарса қилмаган, аммо ҳайдовчига учта ўқ теккан. ИИВ маълумотларига кўра, унинг аҳволи оғир.
Хабарда айтилишича, суиқасд 22 сентябрь куни Киев вилоятининг Лесники туманида содир этилган. Ҳозирда икки ёки ундан ортиқ шахсга суиқасд қилиш юзасидан жиноят иши қўзғатилган. Президент офиси раҳбари маслаҳатчиси Михаил Подолякнинг фикрича, ушбу ҳодиса ҳукуматнинг олигархларга қарши кураши ортидан юз берган бўлиши мумкин.
Украина парламентидаги ҳукмрон партия “Слуга народа” (Зеленский партияси) фракцияси раҳбари Давид Арахамия суиқасднинг уч сценарийсини айтиб ўтди.
Биринчи тахминга кўра, суиқасд жиноятчилар олами томонидан ташкиллаштирилган. Иккинчи вариантга кўра, бу Россия махсус хизматларининг иши бўлиши мумкин. Мамлакат молия-саноат доиралари ўртасидаги ўзаро кураш учинчи тахмин сифатида кўрилмоқда. Архамия суиқасдни бевосита Президентга қилинган мурожаат сифатида баҳолади. Чунки “Шефир – дипломат, у исталган киши билан тил топишади. Бу Президентга қилинган мурожаатдан бошқа нарса эмас”, — деган парламент аъзоси.
Украина Президенти Владимир Зеленский ушбу ҳодиса ортида ким турганини билмаслигини айтган. Шунингдек, у БМТ Бош Ассамблеясидаги чиқишидан кейин дарҳол Киевга қайтишини маълум қилди. Зеленский суиқасдга қарши қатъий жавоб беришини таъкидлади.
