Тоғли Қорабоғ деган ҳудуд йўқ — Илҳом Алиев
Озарбайжон Президенти БМТдаги чиқишида Озарбайжон масаласига тўхталди. Бу ҳақда “ТАСС” хабар қилди.
“Озарбайжон ҳарбий-сиёсий йўл билан 30 йиллик низони ҳал қилди, ўз ҳудудий яхлитлиги ва тарихий адолатни тиклади. Қорабоғ низоси ўтмишда қолди. Озарбайжонда эндиликда Тоғли Қорабоғ номли маъмурий-ҳудудий бирлик йўқ. 7 июлдаги Президент қарори билан биз Қорабоғ ва Шарқий Зангезур иқтисодий зонасини ташкил қилдик. Фурсатдан фойдаланиб, ҳуқуқий жиҳатдан мавжуд бўлмаган номларни ишлатмасликка чақираман”, — деган Илҳом Алиев. У Тоғли Қорабоғ номини ишлатишни “сиёсий найранг” сифатида баҳолаган.
Шунингдек, Озарбайжон раҳбари халқаро энергетик компанияларни Қорабоғ ҳудудида “яшил” энергетикани ривожлантиришга чақириб: “Мен халқаро энергетик компанияларни Озарбайжоннинг озод қилинган ҳудудларига инвестиция киритишга чақираман”, — деб айтган.
Бундан аввал Қорабоғ ва Шарқий Зангезур “яшил” энергетика зонаси деб белгилангани маълум қилинди. Алиевнинг сўзларига кўра, бу ҳудудларнинг энергетик салоҳияти 7.2 мегаватт қуёш ва 2 минг мегаватт шамол энергиясини ташкил этади.
Эслатиб ўтамиз, бундан аввал Илҳом Алиев Қорабоғ низоси тўлиқ барҳам топганини маълум қилганди.
