Жерар Депардье Тошкентда

 

Жерар Депардье:

Мен Ўзбекистонга аввал ҳам келганман. Аҳолининг яшаш тарзи урф-одатлари ва баъзи қадимий ўйинларидан хабарим бор. Масалан улоқ ва кўпкари миллий ўйинларини биламан. Ҳаттоки қишлоқларда бу ўйинларни кўзим билан кўриш имконияти ҳам бўлган. Ана ўшандагина бу миллат ҳақида фильм олиш истаги илк бор туғилган. Ушбу мамлакатнинг тарихий жойлари Самарқанд ва Бухорода ҳам бўлганман. Тўғрисини айтсам, ўша вақтда ўзимни эртаклар шаҳрига тушиб қолгандек ҳис қилган эдим. Мени фестивалга таклиф қилишганида эса яна шу мамлакатга ташриф буюришимдан бошим осмонга етди. Бу мамлакатга меҳрим жуда баландлигини билган баъзи яқин танишларим: “Балки сенинг томирингда ўзбеклар қони ҳам қисман бордир” деб ҳам ҳазиллашишди. Мен бошқа мамлакатларга борганимда ўзбеклар хонадонида меҳмонда бўлдим. Ўзбек халқининг қандай меҳмондўст эканлигига яна бир карра амин бўлдим.

Яна бир муҳим жиҳатга тўхталмоқчиман, бу ерга келаётганимда йўлда черковларни кўрдим. Ўзбекистонда ҳар қандай дин вакилларини ҳам илиқ қарши олишларини эшитиб жуда таъсирландим. Бу эса ўзбекларни бағрикенглигидан далолатдир.

Ўзбекистонда ҳужжатли фильм олибсиз шу ҳақда гапирсангиз?

Ҳа биз Ўзбекистонда ҳужжатли фильм олдик. Бу фильмнинг сюжети юртининг тарихи, маданияти ва урф одатига бўлган муҳаббати ҳақидадир. Сабаби бу ердан тарихий буюк шахслар ўтган. Улар ҳақида кўплаб фильмлар олиш мумкин. Шунингдек мени "Орол" денгизи ҳам қизиқтириб қўйди. Бутун бошли "Орол" йўқ бўлиб кетгани мени чуқур ўйлантирди. Албатта эколог эмасман, аммо табиатга бефарқ ҳам қараб туролмайман. Бу мен учун “ШОК” бўлди. Ушбу масалада ҳам ҳужжатли фильм олиш истагим бор.

Ижодингиз ҳақида гапириб беринг?

Мен ижодимни театрдан бошлаганман. Саҳна нутқини мукаммал эгаллаш учун қўшимча дарсларга қатнаганман. Жуда кўп бадиий китоблар ўқиганман.Тургенев, Бальзак, Пушкин асарларини севиб ўқиганман. Сизларга ҳам тавсия қиламан.

Кинода роль ижро этишни кеч бошлаганман. Кинони мен жуда севаман. У мени ҳаётининг бир бўлаги. Мени негадир доим саргузаштли фильмларга таклиф қилишган. Мен эса доим жиддий фильмларда роль ижро этишни истардим. Агар ҳозир ҳам жиддий роль таклиф қилишса бажонидил таклифни қабул қиламан.

Кўпроқ қайси давлат фильмларида роль ижро этиш сизга ёқади?

Албатта Россия давлатининг фильмларида роль ижро этиш ёқади. Америка давлати фильмларида унчалик севиб роль ижро этмаганман. Умуман олганда мен эркин фильмларини яхши кўраман.

Бизга маълумки қайсидир муддат давомида сиз Россия фуқароси бўлиб Москвада яшадингиз, ўзингиз айтишингиз бўйича Ўзбекистон ҳам сизга жуда маъқул экан. Айтингчи, кейинчалик Ўзбекистон фуқароси бўлиб юртимизда қолишингиз ҳам мумкинми?

Мен шундоқ ҳам Ўзбекистон маданияти бўйича элчиман. Энди бу давлатга доимий келиб-кетиб юраман. Жуда кўп фильмлар олиш режамда бор.

 

Муножат Валиева