Эрон-Озарбайжон чегарасида хорижий давлат кучлари борми? Озарбайжон ТИВ жавоб берди
Озарбайжон Эрон билан чегарада учинчи давлат кучлари мавжуд эканлиги тўғрисидаги баёнотларни ҳақиқатга асосланмаган маълумот, деб ҳисоблайди. Бу ҳақда мамлакат Ташқи ишлар вазирлиги маълум қилди.
“Биз Озарбайжон — Эрон чегарасида учинчи давлат кучлари мавжудлиги ҳамда бу кучнинг иғвогарона ҳаракатлар содир этаётгани ҳақидаги хабарларни ҳақиқатга мос эмас, деб ҳисоблаймиз. Чунки бу каби баёнотлар ҳеч қандай асосга эга эмас”, – деган ташқи ишлар вазирлиги расмий вакили Лейла Абдуллаева. Бундан аввал Эрон ташқи ишлар вазири Амир Абдуллоҳиён Озарбайжон ҳудудига Исроил ҳарбийлари кириши мумкинлигини айтганди. ТИВ юқоридаги баёноти орқали Абдуллоҳиённинг сўзларига жавоб қайтарди.
Лейла Абдуллаева Озарбайжондаги сиёсий жараёнларга ҳеч қандай ташқи кучлар таъсир қилмаслиги ҳамда Боку ҳар доим миллий манфаатларига таяниб ташқи сиёсат юритганини таъкидлади. “Қўшни давлатлар билан дўстона муносабатлар ўрнатиш ташқи сиёсатимизнинг асосий йўналишларидан бири. Бу йўналишда биз босқичма-босқич ишлар олиб боряпмиз”, – деган Абдуллаева.
Эрон бир неча кундан буён Озарбайжон билан чегара яқинида ҳарбий машғулотлар олиб бормоқда. Боку бунга жавобан Туркия билан 5-8 октябрь кунлари Нахичеван (Эрон чегараси)да машғулотлар ўтказади.
Бундан аввал Илҳом Алиев Тоғли Қорабоғга халқаро энергетика компанияларини таклиф қилганди. Шунингдек, Озарбайжон Арманистон билан муносабатлар яхшиланишининг асосий шартини айтганди.
Жаҳонгир Қўзиев
