Фарғонада ўзаро низо сабаб дўкон ёқиб юборилди
Бу воқеа жорий йилнинг 5 октябрь куни Э. ва унинг танишлари О. ва бошқалар ўртасида келиб чиққан келишмовчилик сабаб юзага келган.
Ушбу фуқаролар жамиятда юриш-туриш қоидаларини қасддан менсимасдан, жамоат жойида бир-бирига тан жароҳати етказган. Шундан сўнг, Э. вa унинг шериклари O.гa тегишли бўлган "Baraka burger" дўкони ойналарини синдиришиб, уни ёқиб юборган.
Мазкур ҳолат юзасидан Фарғона шаҳар Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан Жиноят кодексининг 277-моддаси (безорилик) билан жиноят иши қўзғатилиб, дастлабки тергов ҳаракатлари олиб борилмоқда.
Хозирда Жиноят иши бўйича Э. исмли шахс Жиноят кодексининг 277- (безорилик) ҳамда 173- (мулкни қасддан нобуд қилиш ёки унга зарар етказиш) моддалари билан, О. исмли фуқаро эса шу кодекснинг 277-моддаси билан гумон қилинувчи тариқасида жалб қилиниб, процессуал тартибда ушланган.
Қолган иштирокчиларни аниқлаш чоралари кўрилмоқда.
Аввалроқ Тўйхонада келин-куёв томонлар ўртасида катта жанжал юзага келгани ҳамда Жарқўрғонда безорилик қилган эр-хотинга нисбатан жиноят иши қўзғатилгани ҳақида хабар берилганди.
