Эроннинг биринчи президенти вафот этди
Эроннинг биринчи президенти Абулҳасан Банисадр 88 ёшида Парижда вафот этди. Бу ҳақда “Риа Новости” хабар берди
Банисадр 1980 йилда Эроннинг биринчи президенти этиб сайланган. У узоқ йиллар давомида Оятулло Руҳулло Ҳумайний тарафдори бўлган. Ҳумайний 1979 йилда Эроннинг сўнгги шоҳи Муҳаммад Ризо Паҳлавийни тахтдан ағдарган инқилобга бошчилик қилган. 1980 йилда Эронда бўлиб ўтган сайловларда Банисадр 76.5 фоиз овоз билан ғалаба қозонган ва мамлакат президенти лавозимини эгаллаган.
Аммо 1980 йилда бошланган Ироқ-Эрон уруши унинг ҳам президентлик фаолияти, ҳам келажагига нуқта қўйди. Эрон олий раҳбари Ҳумайний Банисадрни давлатни бошқаришга нолойиқ деб ҳисоблайди. Натижада 1981 йилда парламент унга импичмент эълон қилади. Шундан кейин Банисадр Эронни тарк этган.
Хабарда айтилишича, собиқ президент сўнгги кунларини Парижда ўтказган ва шу ерда 88 ёшида вафот этди. Ўлим сабаблари очиқланмаган.
Бундан аввал АҚШ Эрон масаласида Хитойга илтимос билан чиққани ҳамда Шавкат Мирзиёев Эрон Президенти билан учрашгани хабар қилинганди.
Жаҳонгир Қўзиев
