Кремль “The Sun” нашрининг Россия вакцина таркибини ўғирлагани тўғрисидаги мақоласига жавоб берди
“ ’The Sun’ ўта ғайриилмий газета экани маълум. Шунинг учун мақолага ҳам шу нуқтайи назардан баҳо берамиз”, – деган Россия президенти матбуот котиби Дмитрий Песков.
Шунингдек, Россия давлат думаси депутати Геннадий Онищенко ҳам масалага муносабат билдириб, мақола муаллифларини тиббий кўрикдан ўтиши зарурлиги, Британия разведкаси ходимларини эса истеъфога чиқариш кераклигини таъкидлади.
Маълумот ўрнида: 10 октябрь куни “The Sun” нашри Россияни AstraZeneca вакцинаси таркибини ўғирлашда айблаб чиқди. Нашр маълумотларига кўра, Москва томонидан молиялаштириладиган хакерлар компанияга киберҳужум уюштирган ва россиялик олимлар шу таркиб асосида “Спутник-V” вакцинасини ишлаб чиқарган.
Бундан аввал Жозеф Байден Россия ва Хитой вакциналардан сиёсий мақсадлар йўлида фойдаланишда айблаганди. Шунингдек, Сингапурда коронавирусга қарши эмланмаганларга нисбатан янги чекловлар жорий этилгани хабар қилинганди.
Жаҳонгир Қўзиев
