Россия 2021 йилда нефть-газдан ўтган йилдагига нисбатан 50 миллиард доллар кўп даромад олиши кутилмоқда
2021 йилда Россиянинг бюджет ва нобюджет нефть-газ даромади ўтган йилга нисбатан 70 фоизга ёки 50 миллиард долларга ошиши мумкин. Бу ҳақда “ТАСС” буюртмасига биноан "Fitch" халқаро рейтинг агентлиги эълон қилди.
Fitch’нинг хомашё товарлари ва табиий ресурслар бўйича гуруҳи директори Дмитрий Маринченконинг ҳисоб-китобига кўра, 2021 йилда нефть ва газдан келиб тушадиган даромад 9 триллион рубль ёки 125 миллиард долларни ташкил этади.
“Бу 2020 йилга нисбатан 50 миллиард долларга кўп. Агар макроиқтисодий параметрлар йил бошидаги башоратларга мос келганида эди жорий йилги прогнозлар бундан 40 миллиардга кам бўларди”, — дейди таҳлилчи.
Йил бошида нефть нархи баррелига 45 доллар, газнинг экспорт нархи эса ҳар минг куб метрга 200 долларни ташкил этиши кутилган эди.
Россиянинг 2021 йилда углеводородлар савдосидан даромади прогнози Brent нефтининг бир баррели 70 долларга (2020 йилда 43 доллар) ва “Газпром”нинг ҳар минг куб метрга экспорт нархи 320 долларга (2020 йилда 143 доллар) баҳоланиши ҳисобидан келиб чиққан.
Бундан аввал Польша бош вазири Матеуш Моравецкий Словенияда ташкил этилган Европа Иттифоқининг норасмий форумида Европада газ нархи сунъий омиллар туфайли кескин ошаётганини айтганди.
Шарофат Маҳмудова
