Юртимиздаги сайлов жараёнлари онлайн видео-трансляция қилинади
Бу йилги Президентлик сайлови янада очиқ ва шаффоф ўтишини таъминлаш мақсадида республикадаги айрим сайлов участкаларига кузатув камералари ўрнатилади. Унда трансляция вақти 24 октябрь куни соат 8:00 дан 20:00 гача белгиланган. Бу ҳақда бугун, 13 октябрь куни ўтказилган Марказий сайлов комиссиясининг навбатдаги йиғилишида маълум қилинди.
МСК раисининг ўринбосари Баҳром Қўчқоровнинг сўзларига кўра, бу йилги сайловда республика бўйлаб 207 та сайлов участкасида 414 та кузатув камералари ўрнатилган. Ўзбекистон сайловлари тарихида бу амалиёт илк бор 2019 йилга парламент сайловларида қўлланганди. Ушбу тажриба ўрганилиб, унинг сайлов жараёнларида катта аҳамиятга эгалиги ҳисобга олинда ва бу йил унинг кўлами кенгаймоқда.
Баҳром Қўчқоров кузатув камералари 15 октябрга қадар ўрнатилишини маълум қилди.
Овоз бериш жараёнлари Марказий сайлов комиссиясининг Saylov2021.uz сайлов портали, Матбуот марказидаги катта ҳажмдаги мониторда ва “Ўзбекистон24” телеканалида ҳамда Марказий сайлов комиссияси биносида онлайн трансляция қилиб борилади”, — деди Б.Қўчқоров.
Йиғилишда кўтарилган масалалардан яна бири хорижий кузатувчилар ва ОАВ вакилларининг аккредитацияси бўлди. Ҳозирда ўнта халқаро ташкилотнинг миссияларидан 93 нафар халқаро кузатувчини, шунингдек, йигирмага яқин хорижий давлатдан 84 нафар кузатувчини аккредитация қилиш таклиф этилмоқда. Бугун аккредитация қилинадиган жами кузатувчилар 177 нафарни ташкил этмоқда. Шу тариқа жами рўйхатдан ўтказилган халқаро кузатувчилар 577 нафарни ташкил этмоқда. Шунингдек, ҳозирда 1419 нафар маҳаллий, 146 нафар хорижий ОАВ вакиллари аккредитациядан ўтказилгани маълум қилинди.
Аввалроқ Ўзбекистондаги энг баланд нуқтада жойлашган сайлов участкаси ҳамда Туркияда яшаётган ўзбекистонликлар учун сайлов участкаси ташкил этилгани хабар қилинганди.
