Ўзбекистонга “Sinovak” вакцинаси олиб келинди
Туркия ҳукумати томонидан Ўзбекистонга беғараз ёрдам сифатида COVID-19’га қарши Хитойда ишлаб чиқарилган “Sinovak”вакцинаси олиб келиниши ҳақида хабар берилган эди.
Соғлиқни сақлаш вазирлиги ахборот хизматининг хабар беришича, бугун, 13 октябрь куни Истанбул – Тошкент рейси билан мамлакатга келтирган “Sinovak” вакцинасининг 200 минг дозаси шунингдек, 20 минг қути “Фавипиравир” дори препарати республика вакиллари томонидан қабул қилиб олинди.
Қайд этилишича, Ўзбекистон ва Туркия ҳукуматлари ўртасида соғлиқни сақлаш соҳасида грант ёрдамига оид имзоланган битим асосида олиб келинган “Sinovak” вакцинаси мамлакатга келтирилган олтинчи вакцинадир.
"Шундай қилиб, республикада эмлаш жараёнларида фойдаланилаётган жами вакцина 28 673 528 дозани ташкил қилмоқда", — дейилади хабарда.
Эслатиб ўтамиз, Ўзбекистонда "Sputnik V" вакцинаси ишлаб чиқарила бошланди.
Бундан аввал Ўзбекистонга "Sputnik V" вакцинасининг навбатдаги партияси келтирилиши, Ўзбекистон вакцина захираси бўйича МДҲ мамлакатлари орасида етакчи бўлгани ҳамда “Sputnik V”ни қабул қилиш оралиғи ва унинг иккинчи компонентлари қачон келтирилиши маълум бўлгани ҳақида хабар берилганди.
