Франция пластмасса идишлардан буткул воз кечади
Франция 2022 йил 1 январдан пластик қадоқсиз сотилиши керак бўлган 30 га яқин мева-сабзавот рўйхатини эълон қилди. Бу ҳақда RFI хабар бермоқда.
Шундай қилиб, келгуси йилнинг январидан бошлаб қовоқ, бақлажон, қалампир, бодринг, помидор, пиёз, карам, картошка, сабзи, шолғом, турп ба бошқа сабзавотларни пластмасса идишда қадоқлаб сотиш тақиқланади.
Шунингдек, олма, нок, киви, олхўри, ананас, манго, хурмо, апельсин, мандарин, лимон ва бошқа цитрус меваларни ҳам пластик қадоқларда сотишга ижозат берилмайди.
Баъзи маҳсулотларни пластмасса қадоқларда сотиш мумкин, лекин бу амалиёт ҳам 2026 йилнинг июнь ойи охирига бориб тўхтатилади.
Тез тайёрланадиган ресторанларда овқат истеъмол қилиш учун ишлатиладиган бир марталик пластмасса идишлар 2023 йил январь ойида тақиқланади.
Насиба Тўхтаева
