АҚШ тарихидаги энг машҳур президент Билл Клинтон қандай касалликларни бошдан кечирган?
АҚШ собиқ президенти Билл Клинтон касалхонага ётқизилди. Бу ҳақда CNN хабар берди. Телеканал маълумотларига кўра, собиқ президент қонида инфекция аниқланган.
Ҳозирда Клинтонни антибиотиклар билан муолажа қилишмоқда. Ўз навбатида собиқ президент вакили Анхель Уренья Клинтон касалхонада икки кундан бери даволанаётганлиги ва ҳозирда аҳволи яхши эканини маълум қилди. “Сешанба куни кечқурун президент Клинтон Калифорния университети тиббиёт марказига олиб келинди. У Covid-19 билан боғлиқ бўлмаган инфекцияга қарши муолажа олмоқда. Ҳозирда Клинтоннинг аҳволи яхшиланиб бормоқда, у кўтаринки руҳда ва тиббиёт ходимларидан миннатдор”, – деб ёзган Уренья Twitter саҳифасида.
Бу Билл Клинтоннинг биринчи марта касалхонага ётқизилиши эмас. 2001 йилда унда тери саратони аниқланган. Ўшанда Оқ Уй собиқ президент терисидаги касалланган нуқта операция қилингани тўғрисида баёнот берган.
Бундан ташқари, Клинтон икки марта юрак хуружи билан касалхонага ётқизилган. Биринчи марта у юрак билан боғлиқ муаммога 2004 йилда дуч келган. 2010 йилда эса иккинчи марта кардиологлар билан “учрашган”. Врачлар ўшанда Клинтоннинг касаллиги осон даволанмаслигини маълум қилганди. Шунингдек, мутахассислар собиқ президентнинг касаллигини генетика билан боғлашганди. Маълум бўлишича, Клинтоннинг она авлодида юрак билан боғлик касалликлар кузатилган.
Клинтон АҚШ тарихидаги энг муваффақиятли ва машҳур президентлардан бўлган. У 1993-2001 йилда АҚШни бошқарган. Президентлигининг сўнгги даврида мамлакатнинг 66 фоиз аҳолиси унинг фаолиятини қўллаб-қувватлаган.
Бундан аввал АҚШ собиқ президенти Дональд Трамп навбатдаги сайловларда иштирок этиши ҳамда Байдендан истеъфога чиқишини талаб қилгани хабар қилинганди
