“Кембрия патрули” халқаро мусобақасида Ўзбекистон АҚШни ортда қолдирди
Ўзбекистон ҳарбийлари “Кембрия патрули” халқаро мусобақасида АҚШни ортда қолдириб, иккинчи ўринни эгаллади. Бу ҳақда Мудофаа вазирлиги матбуот хизмати хабар берди.
Маълум қилинишича, жорий йил 29 сентябрдан 17 октябрга қадар Буюк Британиянинг Брекон шаҳрида ўтказилган разведка ва махсус бўлинмаларнинг “Кембрия патрули” халқаро мусобақасида дунёнинг жами 18 та давлатидан 103 та жамоалар иштирок этган. Жумладан, унда Буюк Британия, Ўзбекистон, Косово, Греция, Ирландия, Германия, Латвия, Франсия, Гана, Италия, Ҳиндистон, Полша, АҚШ, Дания, Индонезия, Швейсария, Литва, Нидерландия Қуролли Кучлари разведка ва махсус бўлинмалари ҳарбий хизматчиларидан иборат жамоалар ўзаро баҳс олиб бордилар.
Мусобақанинг фаол фазаси 14 октябр куни бошланган.
Қайд этилишича, мусобақа конкурсларидаги йўналиш 90 км. масофадаги турли даражадаги мураккаб шартлардан иборат бўлиб, ҳар 8-10 км.да бир нечта жанговар топшириқлар бажарилди.
Шунингдек, оммавий қирғин қуролларидан ҳимояланиш воситаларидан фойдаланган ҳолда 3 км масофадаги зарарланган ҳудуддан ўтиш, майдонни разведка қилиш ва тоғ дарёсини кесиб ўтиш, ярадорларга биринчи тиббий ёрдам кўрсатиш, жароҳатланганларни турли йўллар билан эвакуация қилиш, мина тўсиғидан якка ва гуруҳ таркибида ўтиш, душман обектига босқин уюштириш, гаровга олинганларни озод қилиш ва ҳарбий асирларни сўроқ қилиш каби шартлар ҳам бажарилди.
Бундан ташқари жамоаларга 8 та кутилмаган “тест сюрприз” (хорижий давлатлар қуроллари ва ҳарбий техникаси турларини аниқлаш, симуляция ва алоқа ускуналари ёрдамида артиллерия оловини йўналтириш, ҳарбий топография меъёрларни бажариш, Женева конвенсияси бўйича тест топшириш, разведка бўйича ҳисоботларни тайёрлаш ва тузиш, алоқа тайёргарлиги бўйича меъёрларни бажариш, бажарилган тадбирлар бўйича ва кейинги топшириқларни бажаришга шайлиги бўйича билдирув бериш) топшириқлари ҳам берилган эди.
Ўзбекистон Республикаси Мудофаа вазирлиги жамоаси мусобақада турли мураккаб шартлардан иборат 90 км масофани 37 соатда босиб ўтди.
Халқаро мусобақа натижаларига кўра, I ўрин ва олтин медалларни мезбон давлат – Буюк Британия жамоаси, II ўрин ва кумуш медалларни Ўзбекистон Мудофаа вазирлиги жамоаси, III ўрин ва бронза медалларни Америка Қўшма Штатларининг жамоаси эгаллади.
Аввалроқ, бокс бўйича жаҳон чемпионатида совриндорларга қанча пул берилиши ҳақида хабар бергандик.
Мафтуна Режаббоева тайёрлади
