Инновация вазирлиги томонидан етказиб берилган илмий лаборатория асбоб-ускуналари ишлатилмаётганлиги аниқланди
Бу ҳақда АОКАда бўлиб ўтган брифингда Инновацион ривожланиш вазирлиги ахборот хизмати раҳбари Назокат Абдуқундузова батафсил маълумот берди.
Унда айтилишича, ўтган 9 ойда вазирлик томонидан 30,0 миллиард сўмлик 56 та стартап лойиҳалари молиялаштирилди. Шунингдек, 37 нафар ёш олим 6 та хорижий давлатларга (АҚШ, Россия, Буюк Британия, Беларусь, Латвия ва Туркия) илмий стажировкаларга юборилди. Бундан ташқари, 31 турдаги лаборатория асбоб-ускуналари хариди бўйича 19,4 миллиард сўм молиялаштирилди.
Бироқ ушбу илмий лаборатория асбоб-ускуналаридан фойдаланиш натижадорлигини аниқлаш мақсадида олиб борилган ўрганишларда айрим илмий тадқиқот ва ОТМда улардан фойдаланмаслик ҳолатлари аниқланди.
Полимерлар кимёси ва физикаси институтига етказиб берилган “AR403” русумли универсал юритгичли кўп мақсадли илмий лаборатория асбоб-ускунаси (92,0 минг АҚШ доллари) ишлатилмаётгани маълум бўлди.
Яна бир мисол, Хоразм Маъмун академиясига етказиб берилган “SETARAM” русумли кўп тармоқли ўта сезгир дифференциал сканерловчи калориметр илмий лаборатория асбоб-ускунаси (24,0 минг АҚШ доллари) май ойидан буён ишга туширилмаган ва ҳозирги кунда муассаса омборхонасида сақланмоқда.
Аввалроқ Инновацион ривожланиш вазирлигининг вазифалари белгилангани ҳамда Олмазор тумани инновацион ҳудудга айлантирилиши ҳақида хабар берилганди.
Муножат Валиева
