Халқаро медиа-холлда “Юксалиш” ҳаракати эълон қилган танловлар ғолиблари тақдирланди
Халқаро медиа-холлда “Юксалиш” ҳаракати эълон қилган пойтахтнинг Чилонзор туманидаги Ал-Хоразмий майдонини қайта тиклаш бўйича ёш архитектор-дизайнерлар учун танлов ҳамда Ўзбекистон Республикаси мустақиллигининг 30 йиллигига бағишланган #MenUchunQadrli флешмоб-танлови ғолибларини тақдирлаш маросими бўлиб ўтди.
Жорий йилнинг 20 апрелида Халқаро ёдгорликлар ва обидалар кунига бағишлаб ижтимоий тармоқларда флешмоб эълон қилинди. Флешмобга қўшилиш учун ижтимоий тармоқ фойдаланувчилари ўз саҳифаларида #ShaharsozlikTolqini #ГрадостроительнаяВолна хештегларидан фойдаланган ҳолда Ўзбекистоннинг обидалари, тарихий бинолари муҳрланган сурат ва видеоларни жойлаштириши лозим эди. Ўзига хос “челленж” доирасида Ўзбекистоннинг турли ҳудудларидан 60 дан зиёд тарихий объектлар тақдим этилди.
Ҳайъат аъзолари келажак лойиҳалар учун манзил бўла оладиган 3 та объектни танлаб олди. Булар: Тошкент шаҳридаги Ал-Хоразмий майдони, Самарқанд шаҳридаги чашма, Навоий вилояти Кармана туманидаги Мирзачорбоғ саройи.
Ободонлаштириш учун биринчи манзил сифатида пойтахтнинг Чилонзор туманидаги Ал-Хоразмий майдони танланди.
4 июнь куни “Юксалиш” УМҲ, Тошкент шаҳар ҳокимлиги қошидаги жамоатчилик кенгаши ва Ўзбекистон экологик қурилиш кенгаши билан биргаликда Хоразмий майдонини реконструкция қилиш бўйича ёш архитектор-дизайнерлар учун танлов эълон қилинди. Иштирокчилардан майдоннинг ўзига хослигини ва экинларини сақлаб қолган ҳолда ландшафт дизайни концепциясини таклиф қилиш талаб этилган эди.
Мазкур танлов натижаларига кўра, Тошкентдаги Ал-Хоразмий майдонини қайта тиклаш учун ўтказилган танловда “Insard Architects” архитектура бюроси, “МАДО” архитекторлар гуруҳи ҳамда Миракбар Жўраев ғолиб деб топилди. Ғолибларга сертификат ва пул мукофотлари топширилди.
Шунингдек, тадбирда Ўзбекистон мустақиллигининг 30 йиллигига бағишланган #MenUchunQadrli флешмоб-танлови ғолиблари ҳам тақдирланди.
Муножат Валиева
