Гувоҳи бўляпманки қишлоқ одамлари ҳам сайловга бефарқ эмас— Навбаҳор Имомова
Халқаро медиа-холлдаги тадбирлар доирасида zamon.uz таниқли журналист, “Америка Овози” телерадиожурналисти Навбаҳор Имомова билан суҳбат уюштирди.
— Сайлов асли жуда қизиқ жараён. Бу ҳатто эркин бўлмаган жамиятларда ҳам катта қизиқиш уйғотади. Нега? Чунки айнан сайлов пайтида барча сергаклашади. Сиёсатга қизиқмайдиганларда ҳам маълум бир даражада қизиқиш пайдо бўлади.
2019 йилда парламент сайловларини ёритиш учун келганимда мени сайлов кампаниясининг динамикаси лол қолдирган эди. Ўшанда партиялар ўртасида чинакам кураш кетаётганини кўрганман. Сиёсий партиялар бир-биридан ажралиб туришини кўрсатишга ҳаракат қилган.
2019 йилдан буён 2021 йилги президент сайлови бўйича сиёсатчилар, партия лидерларидан сўраб келаман. Чунки бу йилги президент сайлови 2017 йилда бошланган ислоҳотларнинг ҳисоботи, имтиҳони бўлади, деган фикрдаман.
Бу сафарги сайлов жараёнини ёритишни чекка ҳудудлар аҳолисининг фикрини ўрганишдан бошладим. Бир ўзгаришни кўриш мумкин – қишлоқ одамлари ҳам сайловга бефарқ эмас. Сайловчилар тизимдан кўп нарса кутяпти. Шу билан бирга айрим камчиликларни ҳам кузатиш мумкин. Хусусан, аҳолининг айрим қатламлари ҳали ҳам барча масалалар президент томонидан ҳал қилиниши керак, деган фикрда. Шунингдек, бу галги сайловда номзодларнинг аввалги сайловларга нисбатан фаоллигини ҳам кузатиш мумкин.
Аввалроқ МСКда Туркия кузатувчилари билан учрашув бўлгани ҳамда ЎзЛиДеП Президент сайловига тайёргарлик жараёни юзасидан ҳисобот бергани хабар қилинганди.
Жаҳонгир Қўзиев
