Жон Кеннедининг ўлдирилишига доир сирлар орадан 58 йил ўтиб, очиқланмоқда
АҚШ ҳукумати мамлакатнинг 35 президенти Жон Кеннеди ўлимига доир маълумотларни ошкор қилади. Бу ҳақда 22 октябрь куни Оқ уй эълон қилган пресс-релизда сўз боради.
Унда айтилишича, 1992 йилда Кеннедининг ўлдирилиши бўйича маълумотлар, агарда у разведка, мудофаа ва ташқи сиёсатга зарар етказмайдиган бўлса, босқичма-босқич ошкор қилиниши бўйича қарор қабул қилинган.
Жозеф Байден мавжуд ҳужжатларнинг очиқланиши тартибини белгилаб берди. Унга кўра, унинг бир қисми 15 декабрда эълон қилинади. Иккинчи қисми эса, 2022 йилнинг 15 декабридан кейин оммага чиқарилади. Бу таклифни АҚШ архив ва ҳужжатлар миллий бошқармаси берган.
Шунингдек, бу бошқарма ҳужжатларнинг рақамли базасини яратишга жавобгар ҳисобланади. Шу билан бирга баъзи маълумотлар 2022 йилдан кейин ҳам ошкор қилинмайди.
Маълумот ўрнида: Кеннеди АҚШ тарихидаги энг машҳур президентлардан бўлиб, 1961-1963 йилларда мамлакатни бошқарган. 1963 йил 22 ноябрда у Далласда ўлдирилган. Қотил Ли Харви Освальд уни снайпер қуролида ҳалок қилган.
Аввалроқ Жозеф Байден 11 сентябрь воқеаларига оид ҳужжатларни ошкор қилишга буйруқ берганди.
Жаҳонгир Қўзиев
