Мақсадимиз Ўзбекистондаги демократик ўзгаришларни дунёга кўрсатиш – украиналик журналист
zamon.uz украиналик журналист, “Украина-бизнес” нашриёт уйи бош муҳаррири Лариса Семаканинг сайлов ҳақидаги фикрлари билан қизиқди.
Халқаро медиа-холлда халқаро кузатувчи ва журналистлар билан учрашувлар давом этмоқда. zamon.uz украиналик журналист, “Украина-бизнес” нашриёт уйи бош муҳаррири Лариса Семаканинг сайлов ҳақидаги фикрлари билан қизиқди.
Ўзбекистоннинг Украинадаги элчихонаси ёрдами туфайли журналистлар гуруҳи Ўзбекистонда Президент сайловини ёритишга келди. Лойиҳамизнинг мақсади – жараёнларни холис ёритиш, фаол иштирок этиш ва дунё ҳамда Украинага Ўзбекистондаги демократик ўзгаришларни кўрсатиш.
Биз ташрифимизни мазкур медиа-холлдан бошладик. Бу ерда журналистларга сайлов жараёнларини ёритиши учун барча шароит яратиб берилган – техникадан тортиб спикерларга тўғридан тўғри мурожаат қилишгача. Савол-жавоблар онлайн режимда олиб бориляпти ва бу жараённинг янада шаффоф кечишига сабаб бўляпти. Буларнинг барчаси Ўзбекистонда амалга оширилаётган демократик ўзгаришларга тўла мос тушади. Ўзбекистонга энг яхши тилакларни тилайман. Халқларимиз ўртасидаги алоқалар чуқур тарихий илдизга эга. Мен буни янада ривожланиши тарафдориман, – деди журналист.
Бундан аввал белгиялик кузатувчи Руснак Урбаннинг сайлов ҳақидаги фикрлари ҳамда сайлов куни тана ҳарорати юқори бўлганлар учун алоҳида кабина ва қути ташкиллаштирилиши хабар қилинганди.
Жаҳонгир Қўзиев
