Европалик ижодкорлар ҳаммуаллифлигида Янги Ўзбекистоннинг юксалишига бағишланган китоб яратилди
Китоб тобора юксалиб бораётган Янги Ўзбекистон ҳақида.
Бугун Халқаро медиа холлда “Янги Ўзбекистоннинг юксалиши: Миллатнинг мероси, қаҳрамонлари ва диққатга сазовор жойлари” китоб-альбомининг тақдимоти ўтказилди.
Ушбу китоб ўзбек, рус ва инглиз тилларида нашр этилади. Ундан Австрия, Испания, Франция, Буюк Британия ҳамда Германиядан бир қатор ижодкорларнинг кузатишлари жой олган.
Муаллифлар китобни тайёрлаш жараёнида Ўзбекистон аҳолисининг кўп қатлами билан суҳбатлашгани, мамлакатдаги бугунги шароит, янгиланиш ва ўзгаришларнинг уларнинг ҳаётига таъсирини ўргангани, бу борада одамлар фикрини тинглаганини айтди. Шу асосда бир неча йўналиш — энергетика, таълим, соғлиқни сақлаш, маданият каби соҳалар таҳлил қилинганини таъкидлади.
— Китоб европалик ижодкорлар билан ҳаммуаллифликда ёзилган, — дейди британиялик журналист Фред Ҳаррисон. — Уни тайёрлашда қийинчиликка дуч келмадик. Фақатгина, пандемия даври бўлгани учун муаллифлар ZOOM орқали алоқа ўрнатиб, фикр алмашдик. Шунингдек, интернет орқали ҳам Ўзбекистон ҳақида анчагина маълумотлар тўплай олдик.
Баҳринисо Мадумарова
