Очиқ ва шаффоф. МДҲ кузатувчилар миссияси сайловларга баҳо берди

 

25 октябрь куни Марказий Сайлов Комиссияси матбуот марказида Мустақил Давлатлар Ҳамдўстлиги Умумпарламент Ассамблеяси миссияси ҳамда МДҲ мамлакатларидан келган кузатувчилар иштирокида матбуот анжумани бўлиб ўтди. Унда кузатувчилар ўтган сайлов тўғрисида ўз хулосалари билан ўртоқлашди.

 

Хусусан, МДҲ Кузатувчилар миссияси раҳбари, Бошқарув раиси – МДҲ Ижрочи котиби Сергей Лебедев сайлов тўғрисида муҳим фикрлар билдирди.

 

“Ўзбекистон Республикаси Конституцияси ва Сайлов кодекси талабларига тўлиқ риоя қилган ҳолда амалга оширилди, рақобатбардош, эркин, очиқ ва ошкора бўлди, шунингдек, демократик сайловларнинг умумий эътироф этилган тамойилларига тўла жавоб берди ", - деди миссия раҳбари.

 

Шу билан бирга Лебедев техник характердаги айрим тавсиялар берди. МДҲ Кузатувчилар миссияси раҳбари сайловнинг ўзига хос жиҳатига – қора пиар ва “компроматлар жанги” йўқ эканлигига эътибор қаратди.

 

МДҲ кузатувчилар миссияси аъзолари барча номзодларга тенг имкониятлар тақдим этилганини ва сайловлар рақобат асосида ўтганини эътироф этди.

 

Кузутувчилардан яна бири, Тожикистон Олий Мажлиси раисининг биринчи ўринбосари, МДҲ ППА гуруҳи координатори Маҳмадали Маҳмадилло Ватанзода ҳам Президент сайлови таассуротлари билан бўлишди:

 

“Ўзбекистон Республикаси Президенти сайлови маҳаллий ва хорижий оммавий ахборот воситаларида жуда кенг ёритилди. Айниқса, сайлов жараёнларининг онлайн кузатиш имконининг яратилгани демократик ислоҳотларнинг шаффофлигининг бир исботи, десак асло муболаға бўлмайди. Телевидение орқали бериб борилаётган ҳар бир янгилик судо таржимонлар орқали ҳам берилмоқда. Брайл алифбосининг яратилгани — бу муҳим янгилик,  таҳсинга лойиқ! Ўзбекистон сайлов жараёнларига пухта тайёрланган”.

 

Аввалроқ Сайловда аҳолининг неча фоизи иштирок этгани хабар қилинганди. 

 

Баҳринисо Мадумарова