Сайловчиларда ўзгача шукуҳни кўрдим — қозоғистонлик кузатувчи

 

Zamon.uz мухбири Президент сайлови бўйича Қозоғистонлик кузатувчи, “Дўстлик” ҳамжамияти ва халқаро “Амир Темур” хайрия жамғармасининг Қозоғистон республикасидаги раҳбари Икром Ҳошимжоновнинг сайлов жараёни ва якунлари бўйича фикрлари билан қизиқди.

 

— Биз Қозоғистон Республикасидан кузатувчи бўлиб келдик. 24 октябрь куни Республика тарихида катта жараён юз берди. Мен турли сайлов участкаларида турфа миллат вакилларини учратдим. Ҳар бир сайловчи қалбида шукуҳ сезилиб турибди. Об-ҳаво ҳам сайлов куни ажойиб бўлди.

Одамларда юксак ватанпарварлик руҳини кўрдим. Сайловчилар конституциявий ҳуқуқидан тўла фойдаланиб, Янги Ўзбекистон тараққиётига ўз ҳиссасини қўшди. Сайлов участкасида ёшлардан бирига “кимга овоз бердингиз?” деб савол берганимда “келажагим учун” дея жавоб бердим. Ёши улуғлар эса “Биз ўз фарзандларимиз ва набираларимиз келажагини танладик”, – деб таъкидлашди. Сайловлар очиқлик ва шаффофлик руҳида ўтди.

Марказий Сайлов Комиссиясининг брифингида Шавкат Мирзиёев ғалабаси эълон қилинди. Бу дегани – фуқаролар мамлакатда ўтказилаётган кенг кўламли ислоҳотларга ишонч билдирмоқда. Эндиликда Ўзбекистон янада тараққий топишига, ислоҳотлар янада жадаллашишига ишонаман.

 

Аввалроқ Шавкат Мирзиёев яна ишонч билдиргани учун Ўзбекистон халқига миннатдорчилик билдиргани хабар қилинганди.

 

Жаҳонгир Қўзиев