Туркияда етти нафар Россия фуқароси ўрмонга ўт қўйишда гумон қилиниб ҳибсга олинди
Туркия жанубида Россиянинг етти нафар фуқароси ўрмонга ўт қўйишда гумон қилиниб, қўлга олинди.
Бу ҳақда Россия Федерациясининг Анталиядаги бош консуллигига таяниб, “ТАСС” хабар бермоқда.
Қайд этилишича, россиялик сайёҳлар гуруҳи Анталия яқинида қўлга олинган. Улар Чагларжа вилоятидаги ўрмонга ўт қўйишда гумон қилинмоқда.
Россия Бош консуллиги ходими русларнинг ҳибсга олиниши сабабларини билиш учун бўлинмага келган. Адвокатлар илтимосномасига қарамай, суд россиялик сайёҳларни тергов қилиш даврида ўрмонга қасддан ўт қўйганликда гумонланувчи сифатида ҳибсга олишга қарор қилди. Рус сайёҳлари эса ёнғинни атай бошламагани, аксинча, уни ўчиришга ҳаракат қилгани ва махсус хизматга қўнғироқ қилганини айтмоқда.
