Жиддий инқироз яқинлашмоқда — Дмитрий Медведев
РФ собиқ бош вазири бунга нима сабаб бўлишини маълум қилган.
Россия собиқ бош вазири, РФ хавфсизлик кенгаши раиси ўринбосари Дмитрий Медведевнинг фикрича, дунёда озиқ-овқат етишмовчилиги билан боғлиқ жиддий инқироз бошланмоқда. Бу ҳақда Медведевнинг "Новая газета" нашрида эълон қилинган мақоласида сўз боради.
"Очиқ кўриниб турибди — дунёда озиқ-овқат етишмовчилиги билан боғлиқ инқироз бошланмоқда. Уларнинг нархи ҳамма жойда кўтарилмоқда, инфляция тезлашмоқда" — дея қайд этган сиёсатчи.
Шунингдек, Медведев жаҳон иқтисодиётининг ҳозирги ҳолати 2008-2009 йиллардаги молиявий инқироз давридагидан ҳам жиддий эканига эътибор қаратди. Унинг фикрича, ҳозирги иқтисодий инқироз асосан ривожланган ва юқори даражада глобаллашган давлатлар иқтисодиётига кучли зарба берган. Шу билан бирга айнан шу давлатлар тезроқ тикланиш имкониятини намойиш қилмоқда.
Хусусан, Иқтисодий ҳамкорлик ва тараққиёт ташкилоти маълумотларига кўра, аксарият ривожланган давлатлар иқтисодиёти 2022 йил охирига келиб инқирозгача бўлган ҳолатига қайтади. Айрим ривожланаётган мамлакатларда эса бу 2024 йилга келиб юз бериши кутилмоқда. Медведевнинг фикрича, глобал тушкунлик оқибатларини бартараф этиш учун самарали сиёсат юритиш керак.
“Ҳозирнинг ўзида айрим давлатларнинг ташқи қарзи мисли кўрилмаган даражада ошиб кетган. Инфляциянинг ўсиши янги таҳдидга айланди. Иқтисодиёт тикланиши, шунингдек, ташқи савдо айланмасига боғлиқ. Аниқ прогнозларни олдиндан айтиш қийин.
Шу билан бирга энг катта тўсиқлар сиёсий характердаги омиллардир. Улардан бири – коронавирусга қарши кураш бўйича халқаро ҳамкорлик. Аммо кўпчилик давлатларда бу борада сиёсий ирода кўрсатилмаяпти. Бу ҳозирда энг катта муаммолардан бири”, – деган Медведев.
Аввалроқ Владимир Путин Украина ҳақида мақола ёзгани ҳамда CNBC каналига катта интервью бергани хабар қилинганди.
Жаҳонгир Қўзиев
