Халқаро қидирувдаги жиноятчи Абу-Дабида қўлга олинди
У оғир ва ўта оғир жиноятларни содир этган.
Интерполнинг Ўзбекистон Республикасидаги миллий марказий бюроси томонидан халқаро қидирувда бўлган шахс Бирлашган Араб Амирликларида қўлга олинди.
Ушбу шахс 1972 йилда Ўзбекистонда туғилган. Фуқаро С.М. Жиноят кодексининг 155, 161, 242 ва 244-моддаларида назарда тутилган оғир ва ўта оғир жиноятларни содир этган. Шу боис, Ўзбекистон Республикаси ҳуқуқ тартибот органлари томонидан 2006 йилдан бери халқаро қидирувда бўлган.
Даставвал, олинган материаллар асосида ушбу шахснинг тахминий жойлашуви ҳақидаги маълумот Интерполнинг Бош Котибиятига юборилган. Фуқаро С.M. 2006 йилдан АҚШ ҳудудида яшириниб юрганлиги аниқланган. 2021 йилнинг сентябрь ойида Вашингтон миллий марказий бюроси томонидан фуқаро С.M. бу ҳудудни тарк этганлиги тўғрисида маълумот келиб тушган.
Ўзбекистон Республикасидаги миллий марказий бюроси Интерполи ва Бирлашган Араб Амирликлари Абу-Даби Интерполи ходимларининг ҳамкорликдаги тезкор қидирув тадбири натижасида фуқаро С.M. Абу-Дабига етиб келган кунидан беш кун ўтиб қўлга олинди.
Ҳозирда уни Ўзбекистонга экстрадиция қилиш чоралари кўрилмоқда.
