1 ноябрдан I ва II гуруҳ ногиронлиги бўлган фуқароларга айрим давлат хизматларини кўрсатиш бўйича 50 фоизлик чегирма белгиланди
Давлат хизматларини кўрсатишда 60 га яқин ҳужжатларда белгиланган тўловлар бўйича 50 фоиз миқдорида чегирма қўлланилади.
Шу йилнинг 1 ноябридан бошлаб, “Ижтимоий ҳимоя ягона реестри” ахборот тизимида рўйхатга олинган шахсларга, шунингдек, I ва II гуруҳ ногиронлиги бўлган фуқароларга 56 турдаги давлат хизматларини кўрсатиш бўйича 50 фоизлик чегирма белгиланди. Шунингдек, Ягона интерактив давлат хизматлари портали (ЯИДХП) орқали рўйхатда келтирилган давлат хизматларини кўрсатишда ҳам қонунчилик ҳужжатларида белгиланган давлат божлари, йиғимлар ва бошқа ҳар қандай тўловларга 50 фоиз миқдорида чегирма қўлланилади.
Имтиёзга эга бўлган шахсларни аниқлаш Ўзбекистон Республикаси Тиббий-ижтимоий хизматларни ривожлантириш агентлиги ахборот тизимидан реал вақт режимида автоматик тарзда амалга оширилади.
Шу билан бирга, чегирма белгиланган ҳужжатлар орасида Никоҳ қайд этганлиги, никоҳда турмаслиги ёки никоҳдан ажралганлиги тўғрисидаги маълумотномани олиш, судланмаганлик (ёки судланганлик) тўғрисида маълумотномаларни олиш учун ариза, паспортни ID картага алмаштириш учун ариза юбориш, товар белгисини аризачи номига рўйхатдан ўтказиш учун ариза юбориш каби хизматлар мавжуд.
Эслатиб ўтамиз, бундан аввал аҳолининг давлат хизматларидан фойдаланиш имкониятлари кенгайтирилгани ҳақида хабар берилганди.
Чўлпоной Аҳмедова
