Ўн минг нафар ўзбекистонлик меҳнат мигрантлари Россияга юборилади

 

Бу ҳақда Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги мажлислар залида Ўзбекистон Республикаси Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги мутасаддилари томонидан ташкил этилган матбуот анжуманида маълум қилинди.

Анжуманда мутасаддилар томонидан Ўзбекистон Республикаси фуқароларини ташкиллаштирилган ҳолда хорижга ишга жалб қилиш борасида амалга оширилаётган ишлар ҳамда Ўзбекистон фуқароларини Россияда қурилиш соҳасида меҳнат фаолиятини амалга ошириш учун жалб қилиш бўйича пилот лойиҳаси ҳақида батафсил маълумот берилди.

Унга кўра, жорий йил сентябрь ойида Россия Федерацияси Меҳнат ва ижтимоий ҳимоя вазири ўринбосари А.Пудов бошчилигида Қурилиш ва уй-жой хўжалиги, Ички ишлар ва Соғлиқни сақлаш вазирликлари, Роструд, Москва ҳукумати ҳамда “Роскапстрой”, “Нострой”, “Наймикс”, “Альмас-интеграл”, “ПИК Индустрия”, “Ренейссанс Хэви Индастрис”, “Яндекс” каби йирик иш берувчи корхоналар вакилларидан иборат делагациянинг Ўзбекистонга ташрифи доирасида қурилиш соҳасида вақтинчалик меҳнат фаолиятини амалга ошириш учун ўн минг нафар фуқарони Россия Федерациясига ташкилий тарзда ишга жўнатиш бўйича пилот лойиҳаси имзоланган.

– Пилот лойиҳа доирасида 10 минг меҳнат мигранти яқин вақт давомида соддалаштирилган тартиб асосида Ўзбекистондан россияга ишга жалб қилинади. Номзодларни ишга жалб қилиш билан боғлиқ, жумладан, тиббий кўрикдан ўтказиш, эмлаш, рус тили, Россия тарихи ва қонунчилиги бўйича имтиҳон топшириш, патент расмийлаштириш ва транспорт харажатлари иш берувчилар томонидан қопланиши кўзда тутилмоқда, – деди Ташқи меҳнат миграцияси агентлиги бошлиғи Хайрулла Умаров.

Агентлик томонидан Россияда ишлаш истагини билдирган фуқароларга бир қанча қулайликлар яратилган бўлиб, фуқароларга Россия ҳудудида ишлаш ҳуқуқини берувчи патент олишда талаб этиладиган тиббий кўрик Россия соғлиқни сақлаш вазирлиги томонидан Тошкентда ўрнатилган тиббий асбоб-ускуналар ёрдамида амалга оширилади. Шунингдек, патент олишда талаб этиладиган дактилоскопик рўйхатга ва расмга олиш жараёнлари икки давлат Ички ишлар вазирликлари томонидан Россия томони ускуналари ёрдамида амалга оширилади.

Ушбу жараёнлар, яъни Ўзбекистонда фуқарони танлашдан бошлаб, Россияда патент асосида иш бошлашгача бўлган вақт кўпи билан Ўзбекистонда 18 кун, Россияда 7 кун этиб белгиланган. Таъкидлаш жоиз, ушбу тадбирлар Россияда ишлаш истагида бўлган кўплаб юртдошларимиз учун қўшимча имкониятлар яратиб, фуқароларнинг вақти ва харажатлари қисқаришига хизмат қилади.

Шунингдек, анжуман давомида агентлик томонидан хорижий давлатларга юборилаётган фуқароларимизни ҳақ-ҳуқуқларини қонуний ҳимоя қилиш, иш жараёнида қулайликлар яратиш, иш берувчи корхоналар билан қатъий белгиланган тартибда меҳнат шартномасини тузиш, тиббий ва юридик жиҳатдан кўмак бериш каби бир қатор амалий ишлар қилинаётгани ҳақида ҳам маълумот берилди.  

Аввалроқ, меҳнат мигрантларининг Россияга кириши соддалаштирилиши ҳамда Россияда мигрантларга махсус чипли пластик карталар тарқатилиши ҳақида хабар берилганди.