Навоийда Россия авиакомпанияси йўқ рейсга билет сотди
Ҳолат юзасидан Uzbekistan Airports изоҳ берди.
Қайд этилишича, кеча, 8 ноябрь куни тушдан кейин Россиянинг IFly авиакомпанияси томонидан Навоий — Москва ва Навоий — Санкт — Петербург йўналишлари бўйича парвоз қилиш ниятида 200 нафар йўловчи Навоий халқаро аэропортига келган. Бироқ бу рейслар жадвалда бўлмаган.
Йўловчиларнинг сўзларига кўра, улар авиачипталарни "Восток Бухоро" компаниясининг Самарқанд, Бухоро ва Урганч шаҳарларида жойлашган турли филиалларидан харид қилган.
Навоий аэропорти ходимлари чипталарни сотган компания билан боғланиб, йўловчиларга керакли маълумотларни етказишни ва вазиятни бартараф этишни талаб қилган. Компания вакиллари барча йўловчиларга чипта пуллари қайтарилишини маълум қилган.
Эслатиб ўтамиз, аввалроқ Тошкент аэропортида 200 га яқин йўловчи Истанбулга уча олмаганди. Шунингдек, Исломободдан Лондонга учаётган самолёт йўловчи аёлнинг ўлими туфайли Тошкентга фавқулодда қўнгани ҳамда у ўз йўловчиларини олиб кетгани ҳақида хабар берилганди.
