Обама Россия ва Хитойни танқид қилди
Бу иқлим ўзгариши билан боғлиқ.
АҚШ собиқ президенти Барак Обама Россия ва Хитойни иқлим ўзгаришига қарши курашни пайсалга солишда айблади. Бу ҳақда AP хабар берди.
Сиёсатчининг фикрича, бу икки давлат раҳбарлари атмосферага чиқадиган зарарли газларни камайтиришга сайёра экологиясини яхшилашга қаратилган шошилинч ва қатъий қарорлар қабул қилишни истамаяпти. Шунингдек, у Путин ва Си Цзинпинни Глазгодаги иқлим ўзгариши масалаларига бағишланган глобал саммитда иштирок этмагани учун танқид қилди.
“Дунёга энг кўп зарарли модда чиқарадиган икки давлат раҳбарларининг Глазгодаги йиғилишларда иштирок этмагани таажжубга солди. Уларнинг миллий дастурларида эса зудлик билан амалга ошириладиган ишлар ўрин олмаган”, – деган Обама.
Аввалроқ Жозеф Байден Дональд Трампнинг Париж келишувларидан чиққани учун бутун дунёдан узр сўраганди.
Жаҳонгир Қўзиев
