Келишув маросими: БАА ташқи ишлар вазири Сурияга келди
Икки давлат муносабатлари амалда 2011 йилда тўхтаб қолганди.
Сурия президенти Башар Асад Дамашқда БАА ташқи ишлар вазири билан учрашди. Бу ҳақда SANA агентлиги хабар қилди.
Унга кўра, томонлар икки томонлама муносабатларни муҳокама қилган. Шунингдек, инвестицион ҳамкорликни кучайтириш мақсадида ҳаракатларни фаоллаштириш масаласи кўтарилган.
Агентлик БАА ва Сурияни "икки биродар давлат" сифатида таърифлаган.
Башар Асад бу муносабатлар марҳум шайх Зайд бин Султон ал Наҳиён даврида ўргатилганини алоҳида таъкидлади. Шунингдек, БААнинг доимо Сурия халқи тарафида тургани қайд этилган. Асад Абу-Дабининг позициясини "объектив ва тўғри" деб атаган.
Эътиборли томони, БАА 10 йил ичида илк бор Дамашққа юқори мартабали амалдорини ташриф билан жўнатди. 2011 йилдан кейин икки давлат орасидаги дипломатик муносабатлар амалда тўхтаб қолганди.
Аввалроқ Туркия Сурия шимолида ҳарбий операция ўтказиши мумкинлиги хабар қилинганди.
Жаҳонгир Қўзиев
