Ўзбекистонда лаборатория асбоб-ускуналари ва реагентлар сақланадиган омборхона қурилади
Мазкур лойиҳа икки босқичда амалга оширилади.
Бош вазир Абдулла Арипов бошчилигидаги ҳукумат делегациясининг Германия Федератив Республикасига ташрифи доирасида Инновацион ривожланиш вазири Иброҳим Абдураҳмонов “LMS Consult GmbH & Co.KG” компанияси бош директори Штеффен Беурмайстер билан учрашди.
Учрашув давомида, компания инвестициялари ҳисобидан Ўзбекистон Республикаси ҳудудида илмий лаборатория асбоб-ускуналари ва кимёвий реагентларни сақлашга мўлжалланган махсус омборхона ҳамда реагент ва реактивлар сотувини ташкил этиш бўйича ҳамкорлик битими имзоланди.
Ушбу шартноманинг биринчи босқичи — 1000 м2 бўлган омборхона майдони ижарага олинади. Шунингдек, уни 100 минг АҚШ доллари миқдорида инвестиция киритилиши кўзда тутилган.
Иккинчи босқичда омборхона майдонини 2000 м2 гача кенгайтириш бунинг учун компания қўшимча 200 минг АҚШ доллари йўналтириши маълум қилинди.
“LMS Consult GmbH” компанияси билан тузилган шартномаларнинг асосий қисми илм-фанни молиялаштириш ва инновацияларни қўллаб-қувватлаш бўлиб, унга 494,3 минг АҚШ долларлик лаборатория асбоб-ускуналари етказиб берилган.
Шу билан бирга, 2021 йил якунига қадар 322,6 минг АҚШ долларлик шартномалар имзоланади ва жамғарма томонидан аккредитив орқали молиялаштирилади.
Эслатиб ўтамиз, аввалроқ Ўзбекистон-БАА Ишбилармонлар кенгаши ташкил этилиши ҳамда Фарғона вилояти делегациясининг Қирғизистонга сафари давомида икки томон ўртасида ўндан ортиқ шартномалар имзоланиши ҳақида хабар берилганди.
Чўлпоной Аҳмедова
