Тошкент вилоятида фуқарони ИИБ ходимлари кийимсиз кўчага ҳайдагани ростми? (видео)
Мазкур ҳолат юзасидан расмий маълумот берилди.
Маълум бўлишича, ижтимоий тармоқларда Зангиота туманида яшовчи эркак ИИБ ходимлари уни уриб, кийимсиз кўчага чиқариб қўйгани айтилган видеомурожаат тарқалди.
Тошкент вилояти ИИБ матбуот котибининг хабар беришича, жорий йилнинг 11 ноябрь куни кечки соат 20:00 ларда Зангиота тумани "Рамадон" МФЙда яшовчи аёл У.Х. мурожаат қилган.
Мурожаатда у 47 ёшли ишсиз ўғли У.М.нинг мунтазам равишда спиртли ичимлик истеъмол қилишини, айни вақтда уйда жанжал қилиб, онаси ва яқинларига тазйиқ ўтказаётганлигини айтиб, ёрдам сўраган.
ИИБ ходимлари воқеа жойига бориб, У.М.ни қўлга олишган, унга нисбатан МЖтКнинг 183 (майда безорилик), 187 (жамоат жойларида алкоголь маҳсулотини истеъмол қилиш) ҳамда 194 (ИИО ходимининг қонуний талабларини бажармаслик) моддалари билан материаллар расмийлаштириш вақтида, У.М. ИИБнинг маъмурий биносидан қочиб кетган ва гўёки унга нисбатан куч ишлатилганлиги ҳақида ёлғон маълумотларни тарқатган.
Шунингдек, У.М. ИИБ биносига олиб келинган вақтида тез тиббий ёрдам бўлими кўригидан ўтказилган.
Бўлим маълумотларига кўра, У.М.да мастлик ҳолати ва аввалдан чап юзида шилинган жароҳати борлиги кўрсатилган.
Ҳозирда ҳолат юзасидан фуқаро У.М. ИИОга олиб келинган ҳамда унга нисбатан, юқоридаги моддаларга қўшимча равишда МЖтКнинг 40-моддаси (туҳмат) билан материаллар расмийлаштирилиб, судга тақдим этилган.
Эслатиб ўтамиз, аввалроқ банк ходимлари нега калтаклангани ҳамда Қашқадарёда ЙПХ ходимлари томонидан калтакланган фуқаролар қамоққа олингани ҳақида хабар берилганди.
Шунингдек, профилактика инспекторининг эгнидаги хизмат кийимини йиртган фуқарога жиноят иши қўзғатилганди .
Чўлпоной Аҳмедова
