Ўзбекистон делегацияси ЮНЕСКО Бош конференциясининг 41-сессиясида иштирок этди
Парижда 10 ноябрь куни ЮНЕСКО Бош конференциясининг 41-сессияси бўлиб ўтди. Унда Ўзбекистон Республикаси Бош вазири ўринбосари Азиз Абдуҳакимов қатнашди.
Дастлаб Ўзбекистон вакили Президент Шавкат Мирзиёев номидан ЮНЕСКОнинг Бош директори Одри Азулени иккинчи муддатга қайта сайлангани билан табриклади.
Тадбирда Ўзбекистон томонидан ЮНЕСКО мандатига оид йўналишларда олиб борилаётган ишлар хусусида атрофлича маълумот берилди. Хусусан, маданият, таълим, фан ва ахборот технологиялари соҳаларини молиялаштириш, Жаҳон мероси объектларининг уч ўлчамли нусхаларини яратиш учун замонавий рақамли технологияларни жорий этиш, шунингдек, Президент бошчилигида таълим йўналишида “Янги Ўзбекистон” ва илм фан соҳасида “Учинчи ренессанс” каби йирик дастурларнинг амалга оширилишига алоҳида тўхталиб ўтилди. Ташкилот ва унга аъзо мамлакатлар билан Абу Райҳон Берунийнинг 1050 йиллигини нишонлаш, мактабгача таълим соҳасида глобал форум ташкиллаштириш каби бир қатор йўналишларда ҳамкорликни давом эттириш истаги билдирилди.
Тадбир доирасида 2023-йилда Жаҳон туризм ташкилоти Бош Ассамблеясининг 25-сессияси ўтказиладиган жой сифатида Самарқанд шаҳри номзодини илгари суриш бўйича қатор давлатлар делегатлари билан музокаралар олиб борилди. Натижада 10 дан ортиқ мамлакат Самарқанд номзодини қўллаб-қувватлашини билдирди.
ЮНЕСКО Бош конференциясининг 41-сессияси 24 ноябрга қадар давом этади.
