Сўнгги 10 ойда газ баллони ўрнатилган автомобилларнинг 17 таси ёниб кетган

 

Статистик маълумотларга кўра, 2020 йил ва жорий йилнинг 10 ойи давомида республика бўйича газ баллонлари ўрнатилган транспорт воситаларининг 17 таси портлаб кетган. Шулардан бири Фарғона вилоятининг Қува туманида бўлган.

 

Мутахасисларнинг айтишича, аксарият ҳолларда газ баллонларни белгиланган тартибда техник синовдан ўтказмаслик, жисмонан ва маънан эскирган газ баллонларидан фойдаланиш ҳамда автомобильларга газ тўлдириш компрессор шохобчаларида шу каби газ баллонларига ҳамда меъёрдан ортиқ босимда газ тўлдириш сабаб бўлмоқда.

 

Фарғонада Олий Мажлиси Сенатининг Мудофаа ва хавфсизлик масалалари қўмитаси ҳамда вилоят ҳокимлиги ҳамкорлигида ўтказилган видеоселектор йиғилишида газ баллонлари ўрнатилган автотранспортдан эгалари хавфсиз фойдаланиш қоидалари тўғрисида тушунчага эга эмасликлари, бундан ташқари, газ баллонларини автомобильларга ўрнатиш ва тегишли ускуналарни синовдан ўтказиш билан шуғулланувчи хўжалик юритувчи субъектлар фаолияти устидан таъсирчан назоратнинг ўрнатилмагани ҳам нохуш ҳолатларни юзага келтирмоқдалиги маълум қилинди.

 

Сенатнинг Мудофаа ва хавфсизлик масалалари қўмитаси раиси Қутбиддин Бурхановнинг маълумотларига кўра, бугунги кунда Фарғона вилоятида жисмоний шахсларга тегишли 341 минг 820 та автотранспорт воситасининг 249 минг 664 таси, яъни 73 фоизи ва 31 минг 814 та юк ташиш учун мўлжалланган транспорт воситаларининг 29 минг 214 таси, яъни 91,7 фоизи газ баллонлари билан жиҳозланган.

 

Бу каби ҳолатларни олдини олиш борасида амалга оширилиши лозим бўлган вазифалар муҳокама қилинди. Мутасаддиларга кўрсатма ва топшириқлар берилди.

 

Аввалроқ, Қашқадарёда "Lacetti"нинг газ баллони портлаб кетгани, Қашқадарёда юриб кетаётган "Nexia" ёниб кетгани ҳамда Навоийда газ қуйиш шахобчаси портлаб кетгани ҳақида хабар берилганди.

 

Муножат Валиева