Нима учун Афғонистон билан савдони давом эттириш керак?
Эрон-Афғонистон савдо саноат палатаси раиси жавоб берди.
“Эрон-Афғонистон” савдо саноат палатаси раиси Ҳусайн Салимий Афғонистондаги конларни ўзлаштириш юзасидан таклиф берди. Бу ҳақда Tasnim ахборот агентлиги хабар берди.
Маълумотларга кўра, Эрон тоғ-кон саноатига инвестиция киритишни кўриб чиқмоқда. Бу Афғонистон импортнинг аввалги даражасини ушлаб туриши учун амалга оширилади.
“Биз Афғонистон конларига инвестиция киритишни, технологик ва муҳандислик хизматлари экспортини амалга оширишни таклиф қилдик”,– деган Ҳусайн Салимий.
Шунингдек, у Теҳрон ва Кобул ўртасидааги савдо алоқалари аста-секинлик билан тикланаётганини таъкидлади. Аммо бу йил аввал режа қилинган 3.6 миллиард долларлик савдо айланмасига эришиш мушкуллиги қайд этилди.
Бундан ташқари, ҳозирда Эрон Афғонистонда йўллар ва кўприклар қуриш бўйича музокара олиб бораётгани маълум қилинган.
“Улар пул топиш имконига эга бўлса, сотиб олиш имконига ҳам эга бўлади. Биз афғонлар билан ёқилғи савдоси масаласида ҳамкорлик қилишимиз ва бу соҳадаги муаммони ҳал қилишга ёрдам беришимиз керак”, – деб қайд этган Салимий.
Аввалроқ Австралия компанияси Афғонистонда каннабис қайта ишловчи корхона қуриши мумкинлиги ҳақида хабар қилинганди.
Жаҳонгир Қўзиев
