Ўзбекистон Республикаси президенти Ашхободда Покистон раҳбари билан учрашди
Ўзбекистон ва Покистон Президентлари кўп қиррали шерикликни кенгайтириш масалаларини муҳокама қилдилар.
Ашхобод шаҳрида ўтаётган ИҲТ саммити тадбирлари доирасида Ўзбекистон Республикаси Президенти Шавкат Мирзиёев Покистон Ислом Республикаси Президенти Ориф Алвий билан учрашув ўтказган. Бу ҳақида президент матбуот хизмати хабар тарқатди.
Унда айтилишича, учрашувда Ўзбекистон-Покистон кўп қиррали ҳамкорлигини янада кенгайтириш масалалари кўриб чиқилган.
Хабарга кўра, шериклик алоқалари, энг аввало иқтисодиёт йўналишида жадал ривожланиб бораётгани катта мамнуният билан қайд этилган.
Давлат раҳбарлари, шунингдек, минтақа кун тартибидаги долзарб масалалар, шу жумладан, Афғонистонда вужудга келаётган вазиятни ҳам муҳокама қилинган.
Аввалроқ давлатимиз раҳбари Ашхободга етиб келгани ҳақида хабар берилганди.
