Ўзбекистон Республикаси Президенти ИҲТ саммитида нутқ сўзлади
"Бугунги кунда барчамиз глобал ва минтақавий вазиятнинг тобора мураккаблашиб бораётганига гувоҳ бўлиб турибмиз. Бундай ўзгарувчан шароитда қуйидаги устувор йўналишлар бўйича умумий саъй-ҳаракатларимизни бирлаштириш зарур, деб ҳисоблаймиз".
Давлатимиз раҳбари ўз нутқида давом этаётган пандемия таъсирида жаҳон иқтисодиёти ривожида қандай тенденциялар кузатилади, халқаро ҳамжамият яна қандай янги хавф-хатарларга дуч келади, деган саволларга ҳамон аниқ жавоб йўқлигини ҳам айтиб ўтган.
Шунингдек, бундай ўзгарувчан шароитда биргаликда ҳаракат қилиш кераклигини таъкидлаб, бир қатор йўналишларни ўртага ташлаган.
Жумладан, Ўзбекистон Республикаси Президенти Биринчи йўналишда 500 миллиондан ортиқ аҳоли яшайдиган, улкан бозорга эга бўлган мамлакатларимизнинг савдо ва инвестиция соҳаларидаги катта имкониятларидан тўлиқ фойдаланиш зарурлиги таъкидлаган. Бунда савдо кўламини ошириш, мамлакатлар ўртасида савдо-иқтисодий ва инвестиция алоқаларини янада кенгайтириш мақсадлари назарда тутилган.
Иккинчи йўналиш минтақадаги мавжуд ва янги транспорт йўлакларидан унумли фойдаланиш ҳақида бўлиб, бунда минтақалараро транзит ҳаракатини янада жадаллаштириш мақсад қилинган.
“Бу режаларни рўёбга чиқариш учун мамлакатларимизнинг транспорт-коммуникация алоқаларини ривожлантириш ва транзит салоҳиятини кенгайтиришга қаратилган минтақавий стратегияни ишлаб чиқиш мақсадга мувофиқдир", - деган Ўзбекистон Республикаси Президенти.
Учинчи йўналиш “яшил тараққиёт”га эришиш учун амалий саъй-ҳаракатларимизни сафарбар этишимиз ҳақида бўлиб, бунинг учун халқаро эколог олимлар ва экспертлар иштирокида юқори даражадаги (экология вазирлари) доимий Мулоқот кенгашини тузишни таклиф этилган.
Тўртинчи йўналишда эса сайёҳлик алмашувларини қайта тиклаш масаласи кўтарилган.
“Бухоро шаҳрида 2022 йили бўлиб ўтадиган туризм вазирларининг навбатдаги учрашувида пандемиядан кейинги даврда Хавфсиз сайёҳликни ривожлантириш умумминтақавий Дастурини қабул қилиш ташаббусини билдирмоқчиман.
Шу асосда “зиёрат туризми” ва бошқа қўшма сайёҳлик маҳсулотларини ишлаб чиқиш, авиақатновлар географиясини кенгайтириш, туризм инфратузилмасини ривожлантиришга жиддий эътибор қаратилган бўлар эди”, - деган давлатимиз раҳбари Шавкат Мирзиёев.
