"Толибон" озиқ-овқат етишмовчилигида аввалги ҳукуматни айблади

 

“Толибон” мамлакатдаги озиқ-овқат муаммоси аввалги ҳукумат даврида вужудга келганини маълум қилди. Бу ҳақда Афғонистон бош вазири вазифасини бажарувчи Муҳаммад Ҳасан Оҳунд айтган.

 

“Афғонистон Ислом Амирлиги (“Толибон” ҳаракати Афғонистонни шу ном билан атайди) ўз мажбуриятларини бажаришга содиқ қолади. Аммо биз ҳозирда очлик ва нархларнинг кўтарилишига дуч келяпмиз. Бу эса толиблар ҳокимиятни эгаллагунча шаклланган. Яқин кунлар ичида барча муаммоларни ҳал қиламиз. Биз афғонлар ҳаёти ва мол-мулки хавфсизлигини таъминлаймиз”, – деган у.

 

Шу билан бирга Муҳаммад Ҳасан Оҳунд толиблар тузган ҳукуматни инклюзив ҳукумат сифатида баҳолади. Шунингдек, аёллар таълими масаласига тўхталиб ўтди.

 

“Таълим ўғил болалар учун ҳам, қиз болалар учун ҳам мажбурий ҳисобланади. Ҳозирда хотин-қизларнинг янада кенг-қамровли таълим олиши учун шароитлар яратиляпти”, – деб қайд этган бош вазир.

 

Муҳаммад Ҳасан Оҳунд ташқи сиёсат ҳақида гапирар экан, ҳаракат барча давлатлар билан яхши алоқа ўрнатишга ҳаракат қилаётганини яна бир бора таъкидлади. Шу билан бирга у дунё ҳамжамиятини Афғонистонга гуманитар ёрдам беришни давом эттиришга чақирди.

 

Аввалроқ Эрон Афғонистон конларига инвестиция киритиши мумкинлиги маълум қилинганди. Шунингдек, АҚШ толиблар билан терроризмга қарши курашни муҳокама қилмоқчи эканлиги ҳақида хабар қилинганди.

 

Жаҳонгир Қўзиев