Курск вилоятида қилич ўйнатиб, отда дўконга кирган фуқаро жавобгарликка тортилди
Қоидабузар отига нон бериш учун дўконга кирганини айтган.
Курск вилояти полицияси қилич билан отда дўконга кирган эркакни қўлга олди, деб хабар қилди "Риа Новости".
Воқеа Курчатовск вилоятида юз берган. Маҳаллий полиция бўлимига Карл Либкнехт қишлоғидаги дўкон раҳбари қўнғироқ қилиб, савдо дўконига қилич ўйнатиб, от минган маст эркак кириб келганини хабар қилган.
Гувоҳларнинг сўзларига кўра, у ўзини тажовузкор тутган. Тинимсиз ҳавода қиличини ўйнатиб атрофдагиларга хавф туғдирган.
Воқеа жойига полиция етиб келганида, чавандоз ҳали ҳам дўкон ичида бўлган. У дарҳол қўлга олинган. Эркакнинг маст экани тасдиқланган. Аммо у текширувдан бош тортган. Ҳолатга ойдинлик киритиш мақсадида Ички ишлар бўлимига олиб кетилган.
Суриштирув жараёнида қўлга олинган 1978 йилда туғилган К.С. оти оч қолганини, қорнини тўйдириш учун оти билан дўконга кириб борганини сабаб қилиб кўрсатган. Унга нисбатан Ички ишлар органлари ходимларининг қонуний талабини бажармаганлик юзасидан (Маъмурий жавобгарлик тўғрисидаги кодекснинг 19.3- моддаси) маъмурий баённома тузилган ва иши судга оширилган.
Қилич жанговар қурол ёки йўқлигини аниқлаш учун экспертизага юборилган. От эса безорининг уйига қайтарилган.
Аввалроқ Россияда аёл жанговар итга талатилгани ҳамда Мисрда кобра тўрт йўловчи ва ҳайдовчини чақиб ўлдиргани ҳақида хабар берилганди.
Муножат Валиева
