400 миллионлик кредитни “ухлатган” фирибгар қўлга олинди
Ҳозирда тергов ҳаракатлари олиб борилмоқда.
Бу ҳақда Бош прокуратура хабар берди.
Департаментнинг Учтепа туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилди.
Унга кўра, мазкур туманда истиқомат қилувчи “D.K.” МЧЖ раҳбари Ў.С. “S.Y.” шўъба корхонаси раҳбарининг ишончига кириб, корхона мулкини фирибгарлик йўли билан кредит таъминоти учун гаровга қўйади. Оқибатда, банк муассасасидан 400 млн сўм кредит олишга эришади. Ушбу кредит маблағини бошқа хусусий корхонага ўтказиш орқали нақдлаштиради ва пулларнинг 50 млн сўмини “S.Y.” корхонаси раҳбарига беради. Қолган 350 млн сўмини ўзлаштириш йўли билан ўз шахсий манфаатларига ишлатиб юборгани маълум бўлди.
Ушбу ҳолатга Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 168-моддаси (фирибгарлик) билан жиноят иши қўзғатилган.
Эслатиб ўтамиз, аввалроқ Бухорода ногиронлик нафақасини расмийлаштириб беришни ваъда қилган фирибгар ушлангани ҳамда фуқароларни Корея Республикасига ишга юборишни ваъда қилган фирибгарлар қўлга тушгани ҳақида хабар берилганди. Шунингдек, захирадаги ер майдонини сотмоқчи бўлган шахс ушланганди.
Чўлпоной Аҳмедова
