Россия Федерал хавфсизлик xизмати мамлакатдаги ноқонуний қурол савдоси билан шуғулланадиган устахоналар фаолиятини тўхтатди
Уларда 350 дан ортиқ қурол мусодара қилинган.
Бу ҳақда “ТАСС” ҳабар берди.
Хабарга кўра, ҳавфсизлик ходимлари Россия Федерацияси ҳудудидаги 3 та ерости қурол ясовчи усталар устахонаси фаолиятини тўхтатди. Уларга нисбатан жиноий иш очилди.
Бундан ташқари Федерал ҳавфсизлик ҳизмати Россиянинг 18 вилоятида 48 та яширин қурол устасини қўлга олди.
Унга кўра, ерости устахоналарида фуқаролик қуролларининг жанговар хусусиятларини тиклаш ва уларни сотиш билан шуғулланган 85 нафар аҳолининг жиноий ҳаракатларига чек қўйилди.
17 та яширин қуролларни модернизация қилиш ва ўқ-дорилар ишлаб чиқариш цехлари тугатилди. Аниқланишича, маҳаллий ва хорижда ишлаб чиқарилган 353 дона ўқотар ноқонуний қурол муомаладан чиқарилди.
Ҳисоботда мусодара қилинган 29 та пулемёт, 18 та автомат, 224 та тўппонча ва револьвер, 104 та карабин, милтиқ ва ов милтиғи, шунингдек, 10 та артиллерия ўқлари, 14 та пиёдаларга қарши мина, 30 та қўл гранаталари, 11 мингдан ортиқ турли патронлар, тахминан 30 кг портловчи моддалар (порох, тротил), қуролларнинг асосий қисмлари ва компонентлари, овозсиз отиш учун 12 та қурилмалар қайд этилган.
Маълум бўлишича, ноқонуний қурол сотувчилар манзилларида тезкор-қидирув тадбирлари ва тергов ҳаракатлари олиб бориш бўйича махсус операция ноябрь ойида 30 та ҳудудда ўтказилган.
Ушбу ҳолат юзасидан Россия Жиноят кодексининг 222, 223-моддалари бўйича жиноий иш қўзғатилган.
Эслатиб ўтамиз, аввалроқ ҳуқуқ ҳимоячиси Валентина Чупик Россияни тарк этиб Ереванга учуиб кетгани ҳақида хабар берилганди.
Чўлпоной Аҳмедова
